Andi Memeti

Z. Andi Memeti ka lindur në Fier, më 11 Qershor 1989. Prej muajit Mars 2025, z. Memeti mban detyrën e Zëvendësministrit të Financave.
Përpara kësaj detyre, prej vitit 2022, z. Memeti ka ushtruar detyrën e Audituesit të Lartë dhe më pas të Menaxherit të Auditit në Departamentin e Thesarit dhe Planifikimit të Kapitaleve pranë bankës ndërkombëtare të investimeve, Citibank, në Londër, Mbretëri e Bashkuar, ku ndër të tjera, ka udhëhequr dhe realizuar auditime gjithëpërfshirëse, duke përfshirë auditimin e Çështjeve Rregullatore në përputhje me Metodologjinë e Auditit të Brendshëm dhe Standardeve Ndërkombëtare.
Z. Memeti ka punuar gjithashtu si ekspert (Asistent Menaxher) i Auditit të Jashtëm gjatë viteve 2017-2021 për kompaninë më të madhe në botë në fushën e Konsulencës Financiare, Auditit dhe Taksave, Deloitte, në selinë qëndrore në Londër, ku është angazhuar në auditime të ndryshme të klientëve që menaxhojnë asete me vlera të larta, duke filluar nga bankat e investimeve dhe firmat e brokerimit, deri te bankat e nivelit të dytë dhe ofruesit e pavarur të kredive.
Gjatë periudhës 2013-2017, Z.Memeti ka punuar për disa kompani ndërkombëtare, në disa pozicione të ndryshme në fushën e Financës, me fokus si analiza e trendeve të tregut, parashikimi i të ardhurave dhe zbatimi me sukses i strategjive dhe taktikave të rritjes së të ardhurave, testimi i detajuar i Kontrollit të Brendshëm sipas standardeve ndërkombëtare apo analiza e buxhetit dhe parashikimit të performancës financiare të projekteve dhe të treguesve kryesorë.
Studimet e nivelit Bachelor, Diplomë e dyfishtë në degët Politikë dhe Politika Sociale, z. Memeti i ka kryer në një nga universitetet më të mirë në Mbretërinë e Bashkuar, pjesë e Russell Group, në Universitetin e Bristolit. Gjate kësaj periudhe, z. Memeti ka ndjekur dhe studime shtesë në lëndë ekonomike si Makroekonomi, Mikroekonomi apo Metodat Kuantitative. Studimet Master i ka kryer për Politikë, Siguri dhe Integrim në University College London (UCL), renditur rregullisht si një nga 10 universitetet më të mirë në botë.
Z. Memeti është njohës i gjuhëve angleze dhe italiane.